Претставници на Реал во Бразил по потписот на Нејмар

Подолго време се шпекулира дека Реал Мадрид се обидува да го ангажира Нејмар но од таборот на Сантос неодамна нагласија дека бразилскиот интернационалец не е на продажба.

Последните извештаи што пристигнуваат од Бразил и Шпанија, говорат дека делегација на Кралскиот клуб предводена од потпретседателот Фернандо Фернандез Тапиас е во Бразил во обид да биде договорен трансферот на Нејмар.

Се говори дека претставниците на Реал Мадрид ги информирале лидерите на Сантос дека имаат намера да ја платат откупната клаузула во договорот на фудбалерот вредна 45 милиони евра.

Исто така се пишува дека била остварена средба и со агентот на Нејмар, Вагнер Рибеиро на кого му била доставена понуда за договор вреден 5 милиони евра по сезона.

Реал Мадрид сака да го комплетира трансферот на Нејмар пред почетокот на својата сезона додека пак екипата на Сантос посакува да го има на располагање талентираниот напаѓач за Светското Клубско Првенство што во декември ќе се одигра во Јапонија.